Die
oud-baas van die Suid-Afrikaanse Lugdiens (SAL)
mnr.
Khaya Ngqula het net 12 dae voordat hy op spesiale verlof geplaas is, ’n tweede borgskapkontrak
ter waarde van miljoene rande met die internasionale ATP-tennisreeks gesluit,
hoewel hy nie die magte gehad het om dit te doen nie.
Dié
kontrak kan die lugdiens nog tot aan die einde van
2012 sowat R160 miljoen kos.
Ngqula is op 13 Februarie
verlede jaar op spesiale verlof geplaas hangende
die uitslag van ’n KPMG-ondersoek na sy bedrywighede by die SAL. Hy het egter enkele weke later bedank.
Sake24 het
verneem Ngqula het die nuwe ATP-borgskapkontrak
op 1 Februarie 2009 onderteken.
In
die KPMG-ondersoek na Ngqula se bedrywighede by
die SAL is bevind dat hy in 2006 die eerste
ATP-kontrak, ter waarde van R120 miljoen, onregmatig toegeken het.
“Hy
het dit buite die mandaat van die destydse direksie gedoen,” het me. Cheryl
Carolus, voorsitter van die SAL, in die afgelope
week gesê.
Mnr.
Fani Zulu, woordvoerder van die SAL, sê die eerste
kontrak vir die ATP-toer het gestrek van 1 Mei
2006 tot 1 April 2009.
“Die
tweede kontrak geld van 1 Julie 2009 tot 31 Desember 2012 en die waarde daarvan
beloop R160 miljoen,” het Zulu bevestig.
Ngqula het tydens sy bewind ook ander borgskappe
onregmatig toegestaan, onder meer ’n bedrag van R21 miljoen aan die Argentynse
gholfspeler Angel Cabrera.
Hy
het net ’n mandaat gehad om oor borgskappe van tot R3 miljoen te besluit.
Carolus
het gesê die ATP-toer se bestuur sowel as Cabrera is in die KPMG-ondersoek
kwytgeskeld. “Daar was geen teken van enige wanpraktyke van hulle kant af nie.”
Vrae
word intussen gevra oor die rol van die vorige SAL-direksie onder die voorsitterskap van prof. Jakes
Gerwel.
Ngqula en Gerwel het albei in Augustus 2004 in diens
getree by die lugdiens.
Gerwel
is verskeie kere op die rekord aangehaal waar hy
erken dat wanbestuur by die SAL plaasvind.
Gerwel
het reeds op 14 Maart 2007, voor die parlement se
staande komitee oor openbare rekeninge (Skoor), erken dat daar by die SAL inderdaad “onreëlmatige betalings gedoen word”.
Hy
het toe aan Skoor gesê die lugdiens probeer om die “tekort aan stelsels by die
maatskappy reg te stel”.
“Die
maatskappy is vol ernstige onreëlmatighede, maar die direksie doen sy bes om dit
reg te stel,” het hy gesê.
Gerwel
het Vrydag aan Sake24 gesê dit sal onvanpas wees om kommentaar te lewer op ’n proses onder die leiding van die nuwe
direksie.
“As
agtergrond kan ek net sê die ondersoek (na Ngqula
en die SAL) is deur die vorige direksie
begin.
“Ons
het selfs ’n konsepverslag ontvang voordat ons termyn verstryk het en het dit
aan die prokureurs oorhandig. Ons termyn het toe verstryk en die nuwe direksie
neem nou die leiding. As dit nodig gevind word dat ek as voorsitter van die
vorige direksie ondersoek moet word, sal die nuwe
direksie daardie besluit neem.”
Carolus
het gesê daar word nie ondersoek gedoen na die vorige direksie nie.
Zulu
sê die SAL se regspan is nou besig om die twee
kontrakte wat aan die ATP toegeken is, na te gaan om vas te stel wat die
lugdiens se opsies is ten opsigte van die kontrakte.