Pretoria. – Die regering het ’n nuwe aanbod aan staatsdiensvakbonde
gemaak, wat dreig om met ’n massiewe staking te begin wat openbare dienste kan
lam lê.
Mnr. Richard Baloyi minister van staatsdiens en openbare
administrasie, het Vrydag gesê die aangepaste aanbod behels ’n algemene
salarisaanpassing van 6,5% en ’n verhoging in die behuisingsubisdie van die
huidige R500 tot R630 per maand.
Die vakbonde eis ’n loonverhoging van 8,6%, ’n behuisingsubsidie
van R1 000 per maand en ’n inwerkingstellingsdatum van 1 April 2010.
Baloyi het ’n beroep op die vakbonde gedoen om die regering se nuwe
aanbod te aanvaar.
Hy het gesê die regering is daaraan toegewy om in gesprek te bly
met die vakbond totdat ’n ooreenkoms bereik kan word.
Hy dring daarop aan dat die sluiting van die ooreenkoms Woensdag of
voor dié dag moet plaasvind. – Sapa