Johannesburg. – Verbruikers mag dalk persoonlike lenings aangaan om
hul skuld te dek, het DebtBusters Donderdag gesê.
Dit kom ná die nuutste verslag oor kredietverlening, wat onthul het
dat ongesekureerde kredietverlenings vinniger gegroei het in die laaste kwartaal
van 2009 as voor die resessie.
Die Nasionale Kredietreguleerder (NKR) se verbuikerskredietverslag
wys dat ongesekureerde kredietverlenings (persoonlike lenings, kredietkaarte en
winkelkaarte) tot R10,5 miljard gestyg in die vierde kwartaal in vergelyking met
R8,4 miljard in die vorige kwartaal.
“Dit is op die hoogste vlak sedert die NKR dit in die vierde
kwartaal van 2007 begin aanteken het. Dit is ’n groot bekommernis aangesien die
getalle aandui dat Suid-Afrikaanse verbruikers wat in die skuld is net meer
skuld aangaan teen ’n baie hoër rente om huidige skuld te finansier, en so hou
die skuldspiraal vol,” het mnr. Luke Hirst, besturende direkteur van
DebtBusters, gesê.
“Ek vermoed dat soos verbruikers sukkel om toegang te verkry tot
ander vorme van gesekureerde krediet, keer baie na ongesekureerde krediet,” het
mnr. Gabriel Davel, uitvoerende hoof van die NKR, gesê.
DebtBusters het gesê dat van die 18,07 miljoen krediet-aktiewe
verbruikers op rekord is 10,75 miljoen Suid-Afrikaanse verbruikers agterstallig
met hul skuld en sukkel hulle om hul skuldverpligtinge na te kom.
“Meer as 170 000 verbruikers het tot op hede aansoek gedoen vir
skuldberading. Die getal styg net elke maand.
Die eerste stap behels om hul kredietvoorsieners te nader om te
onderhandel oor laer afbetalings. Indien hulle daarmee sukkel, moet hulle ’n
geregistreerde skuldberader kontak om namens hulle te onderhandel,” het Hirst
gesê. – I-Net Bridge