Kaapstad. - Meer woonstel-
en huishuurders het in die tweede kwartaal van vanjaar hul huurgeld betyds betaal as in die eerste
kwartaal.
Die huurmonitor
van TPN, ’n kredietburo wat huurders se betalingsgedrag monitor, toon dat 67% van die huurders hul
huurgeld in die tweede kwartaal betyds betaal het teenoor 63% in die
eerste.
Huurders wat tussen R3 000 en R7 000 per maand vir hul huisvesting betaal, is die
getrouste betalers, want 70% van hulle betaal
betyds.
Nog 13% betaal wel
die volle huurgeld, maar eers laat in die maand.
Byna 50% van die huurders wie se
huurgeld meer as R12 000 per maand beloop, betaal laat, net gedeeltelik of glad
nie.
Dié wat wel betyds
of net laat betaal het, is op 79% darem 7 persentasiepunte meer as in die vorige
kwartaal.
TPN se ontleding
wys huurders verbeter hul betalingsgedrag namate
rentekoerse daal.
Toe die prima
uitleenkoers ’n hoogtepunt van 15,5% bereik het,
het die persentasie huurders wat hul volle
huurgeld betaal, van 85% tot 71% in die eerste
kwartaal van verlede jaar afgeneem.
Met die daling in
rentekoerse met 5,5 persentasiepunte sedert einde 2008 het sulke huurders tot 82% toegeneem.
Die TPN-monitor
wys huurders in die kategorie van R12 000 per maand of meer word die meeste deur
rentekoerse geraak weens hul groter afhanklikheid van krediet.
Gevolglik kan
hulle in tye van hoë rentekoerse nie al hul
maandelikse verpligtinge nakom nie. Huurders aan
die onderpunt van die mark – dié wie se huurgeld
minder as R3 000 per maand beloop – word ook aansienlik deur veranderinge in
rentekoerse geraak.
Die syfers toon
huurders in die Wes-Kaap is die betroubaarste wat
huurbetaling betref, met 85% wat hul volle huurgeld betaal, teenoor 84% van die Oos-Kapenaars en
77% van die Gautengers.