Mediese
fondse kan ’n algemene wagtydperk van drie maande,
’n toestand-spesifieke wagtydperk van 12 maande en ’n boete vir laat aansluiting
instel.
Hoe raak dit jou as jy van fonds wil verander of die eerste keer
aansluit?
Wanneer jy vir die eerste keer by ’n mediese fonds aansoek doen of van
een fonds na ’n ander wil omskakel, kan
wagtydperke van toepassing wees waartydens jy nie ’n eis kan indien nie.
As jy voorts 35 jaar of ouer is en nie
bewys van vorige lidmaatskap van ’n mediese fonds kan lewer nie, kan ’n
boete vir laat aansluiting ook op jou maandelikse bydrae gehef word.
Jou fonds sal waarskynlik ’n algemene wagtydperk van drie maande
instel voordat voordele vir nuwe lede uitbetaal word.
Voordele sal in dié tydperk nie eens uit ’n mediese spaarrekening
betaal word nie, behalwe vir sekere prosedures wat gedek word onder voorgeskrewe
minimum voordele (VMV’s) soos bepaal word deur die Wet op Mediese Skemas.
Hoe werk dit prakties? ’n Man wat ’n fondslid is, trou op 1 Maart.
Hy doen onmiddellik aansoek om sy vrou as sy afhanklike te registreer. Sy is 25
jaar oud en het nog nooit aan ’n fonds behoort
nie. Sy is ook swanger en kry op 1 Oktober ’n
baba.
Die onderskrywingsvoorwaardes wat die fonds ingevolge die Wet op
Mediese Skemas op moeder en kind kan toepas, is
soos volg:
’n Algemene wagtydperk van drie maande en ’n 12-maande-uitsluiting
slegs ten opsigte van swangerskap sal vir die voorafbestaande toestand op die
vrou van toepassing wees omdat sy reeds swanger was toe sy lid van die fonds
geword het, sê mnr. Marcel du Toit, uitvoerende hoof van Optivest Health
Services.
Die swangerskap is glad nie gedek nie omrede dit ’n spesifieke
uitsluitsel is wat die fonds volgens wet mag instel aangaande die 12-maande-
spesifieke uitsluiting op bestaande toestands.
As ’n lid vir die eerste keer aansoek doen om lidmaatskap, is geen
VMV-toestands gedek binne daardie wagtydperke nie.
As sy vir 24 maande en minder lid van ’n fonds was en skuif dan na
’n ander, met ’n breuk van minder as 90 dae, kan
die nuwe fonds wel ’n 3-maande- en ’n 12- maande- spesifieke wagtydperk toepas
op die lid, maar die VMV-toestands gaan wel gedek wees.
Volgens Du Toit beteken dit as die lid oorskuif en reeds swanger is
en sy kraam binne haar 12- maande- spesifieke wagtydperk, moet die fonds die
koste betaal volgens fondsreëls, en VMV-voordele omdat dit ’n VMV is. Die lid
moet dan egter die fonds se diensverskaffer van keuse gebruik.
Die ouers kan die kind dadelik as lid
van die fonds registreer, hoewel hulle 30 dae vanaf geboorte tyd het om dit te
doen.
Afhangend van jou mediesefondsgeskiedenis kan ’n wagtydperk van tot 12 maande vanaf die
aanvangsdatum van jou lidmaatskap ingestel word wat ’n voorafbestaande toestand
betref, soos bogenoemde voorbeeld verduidelik.
Geen voordele word uitbetaal vir enige uitgawes wat met die
toestand verband hou nie.
Boete vir laat aansluiting
Dit is ’n boete wat by wyse van bykomende bydraes opgelê word op
mense wat laat in hul lewe by ’n fonds aansluit, soos ’n aansoeker wat 35 jaar
of ouer is en wat nie voor of vanaf 1 April 2001 tot die aansoekdatum lid van
een of meer fondse was sonder ’n onderbreking van meer as drie opeenvolgende
maande sedertdien nie.
Jy neem jou ouderdom en trek die totale aantal jare wat jy sedert
die ouderdom van 21 lid van ’n fonds was daarvan af.
Die antwoord gaan volgens
’n spesifieke tabel ’n persentasie van jou premie uitdruk. Die tabel wat gebruik
word, werk soos volg: As jou ouderdom minus die aantal jare by ’n fonds tussen
35 en 39 is, is die boete 5%; as dit tussen 40 en 49 is, is die boete 25%;
tussen 50 en 59 is dit 50%; en as dit 60 en meer is, is dit 75%.
“Gestel jy is 50 jaar oud is en het voorheen vir 10 jaar aan
Liberty se fonds behoort en aan Discovery vir 3 jaar. Dan trek jy 13 van 50 af,
wat 37 is. Jou boete vir laat aansluiting sal 5% wees. As jou normale
maandelikse bydrae byvoorbeeld R525 is, maar ’n 5%-boete vir laat aansluiting
geld, sal jou maandelikse bydrae R551,25 wees,” sê Du Toit.
Dié boete word net bereken op die risikobydrae tot die fonds en nie
die volle maandelikse bydrae wat jou spaardeel insluit nie. Om ’n boete te vermy
of te minimaliseer, moet jy aan die fonds bewyse gee van vorige lidmaatskap, óf
’n lidmaatskapsertifikaat óf ’n beëdigde verklaring.
Wees eerlik oor jou
geskiedenis
Mediese fondse ondervind dat mense soms jok oor hul siektetoestande
met die hoop om hul premie te verlaag of wagtydperke te verkort, maar dít kan jou duur te staan kom.
Die risiko is volgens mnr. Thabo Mabeta, voorsitter van Medshield,
dat jy in elke geval die rekening vir duur behandelings of operasies gaan betaal
as dit uitkom dat sekere toestande reeds voor aansluiting bestaan het.
Jou volledige gesondheidstatus asook chroniese toestande, jou
familie se mediese geskiedenis en voormalige operasies moet verklaar word, en
ook dié van afhanklikes.
Vra jou dokter of spesialis vir inligting oor toestande waarvoor jy
reeds behandeling ontvang het sodat jy nie iets uitlaat nie.