Johannesburg. - Mnr.
Gareth Penny wat die afgelope vyf jaar
uitvoerende hoof van De Beers was, het Vrydag gesê hy gaan die groep “in die
komende maande” verlaat.
Die aankondiging kom te midde van ’n herstel tot winsgewendheid in
die groep in die eerste helfte van 2010 ná ’n swak periode in 2009 waarin uitset
gesny is en ’n kwart van sy personeel afgedank is.
Inkomste was af terwyl skuld geherskeduleer is om druk op die
balansstaat te verlig.
Verbetering in wins is te wyte aan beter ekonomiese omstandighede
waarin verbruikers weer juweliersware begin koop het, veral in Indië en China en
waarin die slyphuise weer begin voorraad opbou het.
Verkope van ongeslypte diamante aan DTC, De Beers se
handelsmaatskappy in Londen, was $2,6 miljard.
Produksie van diamante in De Beers het gestyg tot 15,4 miljoen
karaat.
In die eerste helfte van 2009 was daar maar 6,6 miljoen karaat
gemyn.
Die groep se voorsitter, mnr.
Nicky Oppenheimer, sê Penny het in sy
termyn die groep uitstekend geposisioneer vir goeie groei.
Daar word egter ook erken dat die ekonomiese herstel wêreldwyd
kwesbaar is, veral in die VSA, Japan en Europa. Die res van 2010 word dus
versigtig benader.
Gerugte in die bedryf wil dit geruime tyd reeds hê dat Penny gevra
is om te gaan sodat ’n nuwe bestuur in plek kan kom. Verwante spekulasie is dat
Anglo American, wat 45% van De Beers besit, die diamantgroep weer wil noteer op
die JSE nadat die Oppenheimer-familie dit in 2000 gedenoteer het.
Sowel De Beers as Anglo sê egter notering word nie oorweeg
nie.
Penny was 22 jaar verbonde aan De Beers. - miningmx.com