Verwante Artikels
Top Stories
Mei 21 2012 05:00
Die beoogde uitfasering van loodvervangingspetrol gaan sekere motoreienaars geld kos.
Mei 21 2012 05:00
Geen van die staat se beloofde infrastruktuurprojekte het nog ’n werklikheid geword nie.
Mei 21 2012 05:00
Verskeie SA wynmakers het reeds ingeskryf vir die toonaangewende Chinese Wyntoekennings-plegtigheid.
Pretoria. – Dit is ironies dat die meeste ondernemings duisende
rande bestee aan die beskerming van hul elektroniese data, maar vreemdelinge
vertrou om die papierdokumente wat hulle nie meer nodig het nie, te
verwyder.
Ondernemings en nywerhede moet hul dokumentvernietigingspraktyke,
wat dikwels oor die hoof gesien word en ’n belangrike aspek van databeskerming
is, hersien, sê mnr. Gianmarco Lorenzi, uitvoerende hoof van Cleardata.
Dokumente wat persoonlike inligting soos adresse en
bankbesonderhede bevat en afskrifte van identiteitsdokumente moet vernietig word
op ’n manier wat verhoed dat iemand dit kan misbruik.
Benewens die voor die hand liggende risiko’s, soos
identiteitsdiefstal en die uitlap van handelsgeheime, kan die wetlike
implikasies van nie-voldoening ’n maatskappy duur te staan kom en sy reputasie
skaad, sê Lorenzi.
“Konsepwetgewing oor die beskerming van persoonlike inligting gee
vir die eerste keer aandag aan die belangrikheid van hoe ondernemings inligting
versamel, berg, verwerk en uiteindelik weggooi.”
Wanneer die wetgewing van krag word, sal alle ondernemings of
gebruikers verplig wees om die veiligheid van die inligting te respekteer, sê
hy. Kliënte sal van byvoorbeeld hul bankiers kan verwag om persoonlike inligting
te vernietig sonder om hul identiteit of persoonlike inligting bloot te stel.
Siviele en strafregtelike boetes sal vir nie-nakoming opgelê kan word.
Lorenzi beveel aan dat die regering, banke en die mediese en
finansiële sektor, wat daagliks groot hoeveelhede persoonlike inligting
behartig, versigtig is wanneer hulle ontslae raak van dokumente. “Benewens die
regsgevolge is dit net goeie sakesin om jou
kliënte se persoonlike inligting te beskerm sodat jy goeie verhoudinge
handhaaf.”
Hy sê die meeste groot Suid-Afrikaanse maatskappye begin die
belangrikheid van die verantwoordelike vernietiging van dokumente besef as
gevolg van die druk van internasionale beheermaatskappye en groter bewustheid
van die risiko’s wat dit inhou as dit nie gedoen word nie. Deesdae is daar ook
’n groter fokus op die vermindering van koolstofvrystellings en op
papierherwinning.