Johannesburg. – Suid-Afrikaanse kleinhandelaars is goeie
maatskappye, maar hul aandeelpryse is hoog en dit
is nie ’n uitgemaakte saak dat hulle die groei in
hul verdienste sal kan volhou nie.
Mnr. Paul Bosman, portefeuljebestuurder by PSG Batebestuur, sê
kleinhandelaars en banke is twee sektore wat bedreig word omdat dit nie meer so moeilik soos in die
verlede is om tot die bedryf toe te tree nie.
Bosman sê die grootste bedreiging vir die volgehoue sterk groei in kleinhandelaars is die toetrede van buitelandse
maatskappye tot die Suid-Afrikaanse mark (soos Walmart) en die groei in aanlyn inkopies.
Daar is al meer maatskappye met webwerwe waar inkopies gedoen kan
word.
Volgens Bosman is die strawwe mededinging onder kredietverskaffers
ook ’n spesifieke bedreiging vir meubelhandelaars. Hulle loop die gevaar om
hul verkope te knou deur té hoë rentekoerse te vra
op kredietooreenkomste.
Mnr. Chris Gilmour, portefeuljebestuurder van Absa Batebestuur, sê
Suid-Afrikaanse kleinhandelaandele is baie duur.
“As ons hulpbronaandele buite berekening laat, is die
prys-verdienste-veelvoud (p/v) van die JSE se algehele indeks by 16 en hoër as
sy langtermyngemiddeld.”
Die p/v van ’n aandeel dui aan hoeveel rand beleggers bereid is om
te betaal vir elke rand van die maatskappy se verdienste.
Wanneer ’n aandeel ’n hoë p/v het, kan dit daarop dui dat beleggers
bereid is om meer vir die aandeel te betaal omdat hulle verwag dat die
maatskappy se verdienste in die toekoms gaan styg.
Beleggers op soek na groei kies dus
aandele met hoë p/v’s, maar beleggers wat soek na meer waarde vir hul geld koop aandele met laer p/v’s.
Mnr. John Morris, beleggingstrateeg vir Suid-Afrika by Bank of
America Merrill Lynch (BofAML), sê beleggers het sedert die derde kwartaal van
verlede jaar baie defensiewe aandele gekoop en dus dié aandele se pryse
opgestoot.
Kleinhandelaandele word as defensief beskou omdat hulle konstante
opbrengste bied ongeag die toestand van die ekonomie.
“Kleinhandel, banke en telekommunikasie lyk minder aanloklik as in
2011 en lyk duur teenoor ander ontluikende markte,” sê Morris.
Hy sê buitelanders het die afgelope drie jaar baie in kleinhandel
in ontluikende ekonomieë belê, om te probeer munt slaan uit sterker
verbruikersbesteding in dié lande.
Suid-Afrikaanse kleinhandelaandele se waardasie het hulle voorheen
40% goedkoper gemaak as kleinhandelaandele in ander ontluikende markte, maar
verlede jaar se defensiewe lopie het dié verskil uitgewis.
Morris sê kleinhandelaandele kan noodsaaklike verskansing teen
inflasie bied – mits beleggers die regtes kies.
“Ons verwag vanjaar swakker ekonomiese groei en voedselinflasie wat voedselkleinhandelaars in
die laer LSM-markte, wat laer waardeer is, op ons radar hou.”
BofAML kies AVI, Spar en Bidvest vir beskerming teen inflasie. Met
’n p/v van 21 bied Spar die beste waarde vir geld van die drie groot
Suid-Afrikaanse
voedselkleinhandelaars. Shoprite se p/v staan op 26 en P n P s’n
op 36. PSG meen dat P n P steeds ’n goeie kopie is, asook AVI.
Morris sê beleggers moet ook die regte oomblik kies wanneer hulle
kleinhandelaandele koop.
“Ons koop versigtig uitgekiesde kleinhandelaandele wanneer die rand
swak is. ’n Sterk rand versterk kleinhandel en ’n swak rand beïnvloed dit
negatief. Beleggers moet dus die gunstigste omstandighede kies om kleinhandel te
koop.”
Gilmour sê weer voedselkleinhandelaars is veral oorwaardeer.
“Hulle sal beslis goed vaar te midde van inflasie, maar dit is meer
as verdiskonteer in die aandeelprys. Jy moet jouself afvra of jy bereid is om só
duur te betaal vir beskerming.”
Gilmour meen JD Group en Lewis bied goeie waarde vir geld.