Verwante Artikels
Top Stories
Mei 21 2012 05:00
Die beoogde uitfasering van loodvervangingspetrol gaan sekere motoreienaars geld kos.
Mei 21 2012 05:00
Geen van die staat se beloofde infrastruktuurprojekte het nog ’n werklikheid geword nie.
Mei 21 2012 05:00
Verskeie SA wynmakers het reeds ingeskryf vir die toonaangewende Chinese Wyntoekennings-plegtigheid.
Kaapstad. – Suid-Afrika se groot kleinhandelaars het geklim op die ranglys van die 250 top-maatskappye wêreldwyd. Die Shoprite-groep is steeds voor in die plaaslike koor op nr. 92. Dít blyk uit Deloitte se nuutste jaarlikse internasionale kleinhandelverslag, Global Powers of Retailing 2012: Switching Channels.
Die navorsing is gegrond op verkope in 2010, ’n tyd waarin kleinhandelaars in ontwikkelde markte gesukkel het om hul verkope te laat groei. Om internasionale verkope te kan vergelyk, word dit in Amerikaanse dollar aangegee. Volgens sy internasionale gradering lyk dit of Checkers inderdaad om elke hoek is. Die Shoprite-groep is die grootste kleinhandelaar in Afrika en die Midde-Ooste en was voorheen in die 95ste plek op die wêreldlys. Sy verkope was in 2010 sowat $10 miljard.
Massmart is die tweede grootste in Afrika en 126ste op die internasionale rangleer met verkope van $7,6 miljard. Pick n Pay is nie ver agter nie op nr. 133, met verkope van $7,1 miljard. Hy is derde op die vasteland. Spar se verkope was $4,7 miljard en is die vierde grootste in Afrika en nr. 179 internasionaal.
Steinhoff International, wat verkrygings in Europa gedoen het net toe die Europese kredietkrisis begin het, is vir die eerste keer op die internasionale ranglys, op nr. 218. Die groep se verkope was $3,7 miljard.
Woolworths het van 248 tot 222 verbeter met verkope van $3,6 miljard. Metcash wat deur ’n herstrukturering gaan het sy plek op die lys verloor.
Die sterkste saamgestelde jaarlikse verkoopsgroei per streek is oor die afgelope vyf jaar in Afrika en die Midde-Ooste met groei van 15,4% behaal, sê mnr. Rodger George, Deloitte se hoof van verbruikersondernemingsbedrywe. Latyns-Amerika is in die tweede plek met groei van 14,8%, maar al die ander streke het met minder as 7,6% gegroei.