Verwante Artikels
Top Stories
Mei 21 2012 05:00
Die beoogde uitfasering van loodvervangingspetrol gaan sekere motoreienaars geld kos.
Mei 21 2012 05:00
Geen van die staat se beloofde infrastruktuurprojekte het nog ’n werklikheid geword nie.
Mei 21 2012 05:00
Verskeie SA wynmakers het reeds ingeskryf vir die toonaangewende Chinese Wyntoekennings-plegtigheid.
Kaapstad. – Foutiewe inligting van die departement van arbeid oor
nuwe loonskale vir plaaswerkers maak boere die hoenders in terwyl
plaaswerkervakbonde kraai van plesier.
Daar is nie alleen foutiewe skale in die Staatskoerant op 18 Januarie 2012 gepubliseer nie, maar die
basis waarop die verhogings vir die volgende 12 maande bereken is, is nie in
ooreenstemming met die formule waarop daar ooreengekom is in vorige
onderhandelings nie.
Me. Elize van der Westhuizen, bestuurder: mensehulpbronne by Agri
SA, sê die boere is kwaad oor die aankondiging dat minimum weeklikse lone van
begin Maart op R374,10 per week vasgestel word teenoor die huidige R317,51 per
week. Dit was skynbaar ’n vingerfout by die
departement aangesien die nuwe loonvlak vir weeklikse lone R347,10 behoort te
wees.
Sy sê hulle het die departement reeds op 20 Januarie laat weet dat
die bedrag van R374,10 wat twee dae tevore gepubliseer is, foutief is.
Dit blyk dat die departement nie
haastig is om die fout reg te stel nie.
Op grond van inligting deur die departement wat deur die
nuusagentskap Sapa op 2 Februarie uitgereik is, en in Sake24 van 3 Februarie oor berig is, was dit steeds die foutiewe inligting wat gegee is. In ’n
brief aan Agri SA sê mnr. Titus Mtsweni, woordvoerder van die departement, hulle
werk daaraan om die fout voor begin Maart reg te stel.
Intussen dring plaaswerkervakbonde daarop aan dat die foutiewe
skaal by nuwe loononderhandelinge gebruik word, want dit is die een wat in die Staatskoerant gepubliseer is.
Dit blyk dat daar by die berekening
van die nuwe skale nie gehou is by die ooreengekome formule om die jaarlikse
verhoging in minimumlone te bepaal nie. Die formule behoort te wees die vorige
vlak van lone plus die afgelope jaar se inflasiekoers plus 1,5%.
Met die berekening van die voorgestelde nuwe skale is die oorhoofse
inflasiekoers van die afgelope jaar van 6,1% nie gebruik nie, maar die
7,8%-inflasiekoers van die armste 20% van die land of te wel die laagste
kwantiel. As die 6,1% as maatstaf gebruik sou word, sou die nuwe loonaanpassings
baie minder as die voorgestelde 9,3% gewees het.