Verwante Artikels
Top Stories
Mei 21 2012 05:00
Die beoogde uitfasering van loodvervangingspetrol gaan sekere motoreienaars geld kos.
Mei 21 2012 05:00
Geen van die staat se beloofde infrastruktuurprojekte het nog ’n werklikheid geword nie.
Mei 21 2012 05:00
Verskeie SA wynmakers het reeds ingeskryf vir die toonaangewende Chinese Wyntoekennings-plegtigheid.
Santiago (Chili). – Anglo American
het vandeesweek die eerste koper afgelewer uit die
reusagtige Los Broncos-kopermyn, die R22,5 miljard-uitbreidingsprojek waaroor
Anglo in ’n bitter twis met die staatsbeheerde
Codelco-mynmaatskappy van Chili gewikkel is.
Mnr. John MacKenzie, uitvoerende hoof van Anglo se koper-sake-eenheid, het eergister onverstoord
die nuwe infrastruktuur by die myn, wat sowat 3 500 m bo seespieël in die
Andes-gebergte is, aan besoekers uitgewys.
Terwyl hy daarmee besig was, het die land se minister van myne,
mnr. Hernán de Solminihac, Anglo en Codelco
aangeraai om ’n skikking te bereik eerder as om in ’n hofstryd betrokke te
raak.
Codelco glo hy is daarop geregtig om 49% van die myn te koop.
Hy kan die opsie, wat al vanaf die 1980’s geld, net elke tweede
Januarie uitoefen maar volgens alle aanduidings het hy die prys wat hy daarvoor
sou betaal bereken sonder om die verhoogde produksie uit die nuwe infrastruktuur in ag te neem.
MacKenzie het gister gesê hy verwag dat die opbou tot die
verdubbeling van Los Broncos se produksie – van 220 000 ton koper tot 450 000
ton per jaar – binne 12 maande afgehandel sal wees.
Dit gaan van Los Broncos die wêreld se vyfde grootste kopermyn maak
in ’n tydperk waarin verwag word dat die wêreldvraag tot 2015 met tussen 4% en
6% per jaar gaan groei.
Anglo het vroeër vandeesmaand
onverwags aangekondig dat hy 24,5% van die myn vir $5,39 miljard aan Mitsubishi
van Japan verkoop het.
Dit is min of meer dieselfde bedrag as wat Codelco bereid was om
vir die 49% te betaal waarop hy al jare ’n opsie het, maar nou eers wil uitoefen
nadat Anglo die enorme beleggings in die myn
gedoen het.
Anglo het daarmee die mat onder
Codelco se voete uitgepluk. ’n Omgekrapte mnr. Diego Hernandez, Codelco se
uitvoerende hoof, het vroeër gedreig dat Anglo “sy
toekoms in die wêreld se grootste koperproduserende land in gevaar stel” deur
Codelco sy aanspraak op die 49%-belang in die myn te ontsê.
Anglo is saam met Xstrata ook die
eienaar van Collahuasi, ’n kopermyn in die noorde van die land wat sowat 500 000
ton koper per jaar produseer.
Uitvoerbaarheidstudies word nou gedoen om Collahuasi se
produksievermoë tot sowat 1 miljoen ton te vergroot.
Dit sal hom een van die drie grootste kopermyne ter wêreld maak.
Die ander is BHP Billiton se Escondidamyn, ook in Chili, en
Grasberg in Indonesië wat aan Freeport McMoran behoort. Die twee produseer albei
sowat 1 miljoen ton koper per jaar.