Verwante Artikels
Top Stories
Mei 21 2012 05:00
Die beoogde uitfasering van loodvervangingspetrol gaan sekere motoreienaars geld kos.
Mei 21 2012 05:00
Geen van die staat se beloofde infrastruktuurprojekte het nog ’n werklikheid geword nie.
Mei 21 2012 05:00
Verskeie SA wynmakers het reeds ingeskryf vir die toonaangewende Chinese Wyntoekennings-plegtigheid.
Johannesburg. – Implats het gister al 25 000 die werkers in sy
Rustenburg-afdeling, verreweg sy mees produktiewe eenheid, afgedank weens ’n
onbeskermde staking.
Die staking spruit uit mededinging tussen twee vakbonde – die
National Union of Mineworkers (NUM), wat jare lank reeds die werkmag
verteenwoordig, en die Association of Mining and Construction Union (Amcu), ’n
taamlik jong vakbond wat die afgelope drie jaar vinnig groei by chroom-,
platinum- en steenkoolmyne in Mpumalanga en Noordwes.
Sover bekend neem sowat 18 000 werkers uit die werkmag van 25 000
aan die staking deel en kom intimidasie wyd voor. Die NUM het gister ook sy
kommer uitgespreek dat geweld daaroor kan losbars.
Arbeidsverhoudinge op platinummyne is
berug vir geweld, deels omdat geen sentrale bedingingsforum bestaan nie en
mededinging tussen vakbonde vinnig en fel kan toeneem wanneer ontevredenheid oor
arbeidskwessies opvlam.
Implats het gisteroggend aangekondig dat hy sy werkmag, wat sedert
Maandagoggend nie kom werk het nie, afdank. Alle werkers wat wíl werk, sal weer
aangestel word.
Sowat 5 000 werkers, almal rotsbooroperateurs, het verlede week
drie dae lank gestaak omdat die res van die werkmag volgens hulle verhogings van
18% gekry het en hulle nie.
Dié staking was ook onbeskermd en was uit verset teen die NUM. Die
rotsbooroperateurs het volgens hulle Amcu as hul verteenwoordiger aangewys, maar
Implats het nog geen erkenningsooreenkoms met die jonger vakbond gesluit
nie.
Implats het die 5 000 rotsbooroperateurs ook afgedank en hulle die
geleentheid gegee om hul werk terug te kry sonder enige verlies aan
diensvoorwaardes, mits hulle teen Vrydag begin werk.
Dit het egter nie gebeur nie. Maandag het produksie heeltemal tot
stilstand gekom.
Van die werkers eis dat Amcu as hul verteenwoordiger erken
word.
Die Rustenburg-afdeling produseer gewoonlik sowat 3 000 onse
platinum per dag en het verlede jaar net meer as die helfte van die groep se
1,8 miljoen onse platinum opgelewer.
Mnr. Jeff Mphalhele, hoofsekretaris van Amcu, sê die vakbond is
besig met ’n werwingsveldtog by Implats, maar het nog geen organiseringsregte
van die maatskappy gekry nie.
“Ons werwing verloop goed, maar ek is nie bewus van enige
intimidasie nie. Ons is besig om kandidate vir ’n voltydse vakbondamptenaar vir
Implats in Rustenburg te oorweeg,” het hy gesê.
Die NUM het gister teen Implats te velde getrek omdat die myngroep
’n vorige onderneming verbreek het deur verhogings aan ’n gedeelte van sy
werkmag te gee.
Die vakbond het gesê hy vermoed Implats wil sy werkmag
herstruktureer.