Implats stoot verdienste op

Johannesburg. - Impala Platinum (Implats) het sy wesensverdienste met 63% tot 345c per aandeel verbeter en het sy tussentydse dividend met 25% tot 150c per aandeel vir die ses maande tot Desember verhoog.

Die sterk verbeterde prestasie is as gevolg van hoër produksie by die Implats-vlagskip Rustenburg-afdeling, die Zimplats-bedrywigheid in Zimbabwe sowel as hoër platinumgroep-metale- (PGM) pryse.

Die toename in verdienste is ten spyte van die versterking van die rand teen die Amerikaanse dollar wat verstewig het tot ’n gemiddelde koers van R7,16/$1 vir die ses maande (vorige vergelykbare tydperk – R7,70/$1).

Volgens Implats het die sluitingswisselkoers van R6,62 vergeleke met R7,39 aan die einde van Desember 2009 gelei tot bykomende verliese in buitelandse valuta-transaksies van R375 miljoen.

“Die gekombineerde uitwerking van die sterker rand is gelyk aan 185c per aandeel na belasting,” het die groep gesê. 

Implats se uitvoerende hoof, mnr. David Brwon, het gesê hy verwag “stram marktoestande” vir beide platinum en palladium as gevolg van die groeiende invloed van die ontluikende markekonomieë gekombineer met “uitdagende aanbodvooruitsigte”.

Hy het bygevoeg dat verdere gunstige faktore die inspuiting van verdere likiditeit in die Amerikaanse ekonomie en die beperking van Europa se skuldprobleme insluit.

Brown het gesê die ekonomiese krag van die ontwikkelende wêreld – veral China – is verantwoordelik vir die voortgesette herstel van platinum vanaf die laagtepunte van 2008 ten spyte van ’n ietwat gestadigde herstel in Westerse wêreldmarkte.

Hy het bygevoeg, “die markprestasie het meer te doen gehad met die oplewing van geldvloei in beleggingsprodukte soos die beurs- verhandelde fondse – wat met 550 000 onse gegroei het gedurende die jaar ná die bekendstelling van die Amerikaanse fonds in Januarie – en die papiermarkte wat sowat 600 000 onse bygevoeg het.

“Uit ’n fisiese vraag perspektief het die Chinese voertuigmark sy plek as die wêreld se grootste voertuigmark bevestig deur ’n skouspelagtige 18 miljoen voertuie plus vir die jaar te verkoop.

“Die juweliersmark het egter ietwat gekonsolideer ná ’n uiters lewendige 2009 toe voorraad aangevul is teen beduidende laer pryse.”

Implats het totale produksie met 6% tot 952 000 onse vir die ses maande verhoog en eenheidskoste-verhogings op ’n 4%-verhoging tot R10,271 per ons van platinum geproduseer gehou.

*Die skrywer besit aandele in Impala Platinum.