Johannesburg. – ’n Stortvloed vaste investering sal die
Suid-Afrikaanse mynbedryf se vermoë ontsluit om in die toekoms op hoë vlak met
mynreuse soos China en Chili skouers te kan skuur.
Trouens, Suid-Afrika se mynbou het nog soveel potensiaal dat hy
klaarblyklik vir die tekort in wêreldwye produksie sal moet opmaak namate
Amerika en Kanada se ontginning van die platinumgroep-metale (PGM) oor die lang
termyn “uitgeput” kan raak.
Dít is enkele van die bevindinge in die nuutste verslag van die
Nywerheidsontwikkelingskorporasie (NOK) oor die vertoning van Suid-Afrika se
primêre en sekondêre ekonomieë.
Luidens die verslag strem die minerale regime,
infrastruktuurbeperkinge, veiligheidskwessies, dalende produktiwiteit, stygende
koste, tekort aan vaardighede en ’n ongestadigde wisselkoers Suid-Afrika om op
sy ryk mineralebronne te kapitaliseer.
In die NOK-verslag word hoop in die regering se beleide rakende
mynbou en ekonomiese groei geplaas om die mynboubedryf te steun.
Die regering se Migdett-taakspan wat na groei en ontwikkeling in
die mynbedryf kyk, sal die dryfveer agter die ommekeer in mynbou wees om
kragtige groei te bewerkstellig, glo die NOK.
Van 2001 tot 2008 het die waardetoevoeging van Suid-Afrika se
mynwese teen ’n bestendig-reële 0,5% per jaar gegroei, in teenstelling met China
se jaarlikse groei van 19%, Chili (12%), Rusland (10%), Indonesië (8%),
Australië (7%) en Venezuela (4%), aldus die Kamer van Mynwese.
Luidens die NOK was die mynbousektor se waardetoevoeging tot die
bruto binnelandse produk (BBP) in die eerste drie kwartale van 2011 altesame
R196 miljard en R50 miljard tot kapitaalbeleggings. In dié tydperk het mynbou
deur sy uitvoerbedrywighede R232 miljard in valutaverdienste gegenereer.
Vaste investering in die mynbou-sektor het volgens die NOK van
2005 tot 2008 jaarliks met 24% uitgebrei, maar dit is nie in veral hoër
produksievlakke gesien nie soos wat in ’n wêreldwye kommoditeite-opbloei verwag
word.
“Daarom is aansienlike hoër vlakke van belegging nodig om die land
se enorme potensiaal te ontsluit, produktiwiteit in sy verskeie
mynbou-sub-sektore te verbeter en die gaping tussen die land se
mineralebenuttingkoers en die wêreldgemiddeld te verklein.”
Dit kan ook tot beduidende werkskepping lei. Hiermee kan ’n
bykomende 143 000 direkte werke teen 2020 geskep word en ongeveer 203 000 teen
2030, lui die verslag.
Volgens die NOK het die getal direkte werke in mynbousektor in die
eerste drie kwartale van 2011 op 520 000 gestaan.
Luidens ekonomiese verwagtinge in die verslag sal die
uitbreidingspotensiaal van veredelde(BENEFICIATED) mineraleprodukte in
Suid-Afrika na verwagting in die komende jare ál meer “progressief
realiseer”.
“Oor die afgelope jaar – en veral in die derde kwartaal – het die
waarde van handel in veredelde minerale in sowel uitvoer as invoer aansienlik
toegeneem.
“In terme van waarde was Amerika Suid-Afrika se belangrikste mark
vir veredelde minerale in die eerste nege maande van 2011. Dit is gevolg deur
China en Japan, wat byna 16% en 13% onderskeidelik verteenwoordig.”
Die verhoogde vraag na juweliersware sal volgens die NOK voortgaan
om een van die vernaamste dryfvere in die behoefte na platinumgroep-metale te
wees.
Die verslag sê die opkomende ekonomieë van vandag sal waarskynlik
voortgaan om betreklik-vinnige groei in kort- tot medium termyn aan te teken,
maar sal spoed verloor op lange duur.
Dit sal die momentum in die uitbreiding oor die wêreld heen sterk
ondersteun en progressief groter dele van wêrelduitvoer, handelaktiwiteit en
beleggingsvloei vereis.
“Die belangrikheid van Suid-Afrika as ’n ryk mineralebron moet
sowel plaaslik as internasionaal voorrang geniet,” lui die verslag.