Aquarius Platinum is nóg positief nóg
negatief oor die vooruitsigte vir die platinummark.
“Ons dink dinge gaan eenvoudig voortdrentel,” het mnr. Stuart
Murray, uitvoerende hoof, gister by die bekendmaking van Aquarius se resultate vir die jaar tot einde Junie
gesê.
Soos die land se ander platinumprodusente ly Aquarius, op drie na Suid-Afrika se grootste
platinumgroep, onder die sterk rand wat die herstel van platinumpryse sedert die
ineenstorting van 2008 grootliks ondermyn.
Die pryse van platinumgroepmetale (PGM’e) het in die boekjaar in
randterme met ’n skamele 10% verbeter teenoor die styging van 18% in die
dollarprys.
Mynkoste het daarenteen in Suid-Afrika met 12% gestyg en by die
groep se Mimosa-myn in Zimbabwe, wat in Amerikaanse dollar boekhou, met
14%.
Die wisselvalligheid van PGM-pryse is ongehoord “en dit maak ons
baie versigtig”, sê Murray.
Aquarius het kort voor die einde van
die boekjaar aangekondig dat hy sy Blue Ridge-projek in Limpopo opskort omdat
die projek teen die huidige platinumpryse eenvoudig nie volhoubaar is nie.
Dié myn sou teen 2013 ’n produksievlak van 140 000 fynonse PGM’e
bereik het.
Aquarius het om dieselfde rede ook
die bedrywighede by sy Marikana-myn se no.1-skag opgeskort.
Die afskrywing van Blue Ridge het ’n gat van $159,8 miljoen in die
inkomstestaat gebrand wat neerkom op ’n netto verlies van $10,4 miljoen.
Sy wins voor belasting, met die nie-kontantafskrywing buite
rekening gelaat, was $25,4 miljoen – ’n daling van 56,5%.
Die groep se toeskryfbare produksie het met 15% verbeter tot
487 405 fynonse PGM’e. Dit was hoofsaaklik weens die hervatting van bedrywighede
by die Everest-myn wat in 2010 ná ’n rotsstorting opgeskort is.
Murray het voorspel dat Aquarius in
die huidige boekjaar nog ’n verbetering van 15% in produksie, tot 550 000
fynonse, sal behaal.
Aquarius ontgin grotendeels in
vennootskappe en net Everest se produksie is ten volle aan hom
toeskryfbaar.
Die deurlopende krag van die rand is slegte nuus vir voornemende
ontwikkelaars van nuwe platinummyne in Suid-Afrika, sê Murray.
“Dit is moeilik om ’n aansporing te vind om nuwe vertikale skagte
in die land grawe. Nuwe ontwikkelings is onwaarskynlik as aandeelhouers nie diep
in hul eie sak wil grou nie.”
Die mees noemenswaardige ontwikkelinge by Aquarius is deur en deur op mediumtermyn gemik. Hy het
twee groot verkrygings naby sy bedrywighede gedoen.
Die verkryging van Booysendal Suid, langs die Everest-myn, by
Northam Platinum vir sowat R1,2 miljard kan dié myn se lewensduur met 30 jaar
verleng. Aquarius beplan om Booysendal Suid deur
Everest se infrastruktuur te ontgin, met sowat R850 miljoen se
kapitaalbesteding.
Dié transaksie sal eers in die tweede helfte van 2012 voltooi word,
het die groep in ’n verklaring gesê.
Aquarius het ook in die boekjaar
$109,7 miljoen betaal vir Afarak Platinum asook dié se Hoedspruit-eiendom naby
Aquarius se Kroondal- en
Marikanabedrywighede.