Verwante Artikels
Top Stories
Mei 21 2012 05:00
Die beoogde uitfasering van loodvervangingspetrol gaan sekere motoreienaars geld kos.
Mei 21 2012 05:00
Geen van die staat se beloofde infrastruktuurprojekte het nog ’n werklikheid geword nie.
Mei 21 2012 05:00
Verskeie SA wynmakers het reeds ingeskryf vir die toonaangewende Chinese Wyntoekennings-plegtigheid.
Johannesburg. – Glencore het uiteindelik stappe gedoen om met Xstrata saam te smelt, maar ontleders twyfel of dié
samevoeging nog soveel sin maak soos tydens Glencore se notering nege maande
gelede.
Xstrata het gisteroggend bekend
gemaak dat Glencore hom met voorstelle oor ’n samesmelting genader het – kort
nadat bespiegelings daaroor op finansiële nuusdienste in Europa begin kop
uitsteek het.
Die nuus het albei se aandeelprys vinnig opgejaag. Glencore het die
dag 5,53% hoër afgesluit en Xstrata 9,74%
hoër.
Glencore besit reeds 34% van Xstrata
en het nou volgens die reëls van die Londense sekuriteite-owerhede tot einde
Februarie om ’n formele aanbod vir die res van Glencore te doen – ’n stap wat
tot ’n mynreus met ’n markwaarde van R600 miljard (£50 miljard) sal lei.
Xstrata het twee jaar gelede ’n
soortgelyke “samevoeging van gelykes” met Anglo American voorgestel, maar Anglo
het nie belang gestel nie. Sedertdien is algemeen aanvaar dat Xstrata en Glencore ’n aanbod vir Anglo sal doen sodra
hulle saamgesmelt het. Die nuus gisteroggend het dus ook onmiddellik Anglo se
aandeelprys met 4,3% opgejaag tot R343,69 – die hoogste vlak in nege
maande.
Maar namate die nuus verteer is, het ontleders bedenkinge
uitgespreek oor die samesmelting, veral omdat Glencore se aandeelprys maar
gesukkel het sedert sy notering. Xstrata het
daarenteen die verwagtinge oortref en die afgelope vier maande het sy
prys-verdienste-veelvoud (p/v) van 4,5 tot 10 toegeneem.
Glencore verhandel dus op ’n p/v-grondslag teen ’n korting
vergeleke met Xstrata. Dit beperk sy moontlikhede
om ’n premie vir Xstrata-aandeelhouers aan te
bied.
Glencore se probleem is dat die mark steeds sukkel om ’n
makelaarsmaatskappy te waardeer teenoor ’n mynmaatskappy. Om Xstrata-aandeelhouers te oortuig van die waarde in
Glencore sal waarskynlik die belangrikste struikelblok wees vir die beoogde
samesmelting.
Dit is glo selfs onder topamptenare van Xstrata ’n probleem. Van hulle is uiters wantrouig oor
die waarde van Glencore. Die afgelope maande is in verskeie oorde in Xstrata gesê dat hy Glencore ontgroei het.
’n Tweede probleem met ’n samesmelting is die topbestuur. Die twee
skatryk voormalige Suid-Afrikaners wat die twee maatskappye uit Switserland
opgebou het tot wêreldrolspelers in hulpbronmarkte, mnre. Ivan Glasenberg van
Glencore en Mick Davis van Xstrata, sal moeilik
vir mekaar terugstaan.
Davis het Glencore sowat tien jaar gelede oorreed om sy
steenkoolbelange in Suid-Afrika en Australië aan Xstrata te verkoop.
Nog ’n probleem is dat ’n samesmelting mededingingsprobleme gaan
skep, veral vir verhittingsteenkool, koper en ferroallooie soos
ferrochroom.
Carroll herstel ná ongeluk
Me. Cynthia Carroll, uitvoerende hoof van Anglo American, “herstel
goed” van ’n heup-operasie ná ’n perdry-ongeluk die naweek in Londen. Mnr.
Pranill Ramchander, Anglo American se woordvoerder in Suid-Afrika, sê Carroll se
dokter het haar aangeraai om nie binne die volgende twee weke oorsee te reis
nie. Dit beteken dan ook dat Carroll nie vanjaar se Mynbou-indaba in Kaapstad
(van 6 tot 9 Februarie) sal bywoon nie.
Volgens Ramchander is daar reeds planne beraam om Carroll se plek
te vul op haar oorsese afsprake. Sy sal egter na verwagting teen einde volgende
week weer by die maatskappy se hoofkantoor in Londen werk. – Anél Viktor en Bloomberg