Engen beklink Afrika-oornames

Kaapstad. - Die Suid-Afrikaanse brandstofmaatskappy Engen het Woensdag amptelik die tjeks geteken vir die oorname van die Amerikaanse oliereus Chevron se brandstofverspreidingsondernemings in Zambië, Malawi en die eiland Reunion, het mnr. Wayne Hartmann, hoofbestuurder van Engen se internasionale sake-afdeling, gesê.

Dit kom nadat Engen vroeër vanjaar die planne aangekondig het om Chevron se bedrywighede in dié lande asook in Zimbabwe, Mosambiek, Tanzanië en Mauritius vir 'n onbekende bedrag te koop. Die transaksies vir die oornames in laasgenoemde lande moet nog deur die nodige regulatoriese en regsprosesse gaan.

Die oorname beteken Engen sal nou in 20 lande in Afrika bedrywig wees.

Engen, waarin die Maleisiese staatsoliegroep Petronas 'n 80%-belang het, se mikpunt is dat 30% van sy totale wins teen 2016 uit sy sake buite Suid-Afrika kom. Dit is tans rondom 10%, sê Hartmann.

Internasionale oliereuse soos Chevron, BP en Shell onttrek hul toenemend uit brandstofverspreiding in Afrika, deels omdat hulle meer wins maak uit hul eksplorasie- en produksiebedrywighede en die verspreiding in Afrika vorm 'n baie klein deel van hul internasionale ondernemings.

Engen is daarenteen toegespits op verspreiding en wil deur organiese groei en oornames verder groei in Afrika.

Volgens Hartmann maak Engen jaarliks tussen 20 en 30 nuwe vulstasies oop, en sal met die jongste verkrygings 1 500 vulstasies in Afrika hê. Die personeel van 220 by die Chevron-bedrywighede wat oorgeneem word, sal behou word.

Hartmann glo daar is nog ruimte vir aansienlike groei vir Engen in Afrika. Die groep is volgens hom nog nie sterk genoeg in belangrike markte soos Kenia, Uganda, Ghana en Nigerië nie.