Verwante Artikels
Top Stories
Mei 21 2012 05:00
Die beoogde uitfasering van loodvervangingspetrol gaan sekere motoreienaars geld kos.
Mei 21 2012 05:00
Geen van die staat se beloofde infrastruktuurprojekte het nog ’n werklikheid geword nie.
Mei 21 2012 05:00
Verskeie SA wynmakers het reeds ingeskryf vir die toonaangewende Chinese Wyntoekennings-plegtigheid.
Johannesburg. – General Motors Suid-Afrika (GMSA) het verlede jaar produksie by sy aanleg in Struandale, Port Elizabeth, tot sowat 33 000 eenhede verhoog van sowat 31 000 die vorige jaar.
Volgens me. Denise van Huyssteen, kommunikasiebestuurder van GMSA, het die groep R1 miljard in drie nuwe voertuigmonteringsprogramme belê.
Hiermee kan die groep sy produksie tot meer as 50 000 eenhede verhoog - die vlak wat nodig is om ingevolge die regering se produksie- en ontwikkelingsplan vir die motorbedryf (APDP) vir aansporings te kwalifiseer.
Vervaardiging van die derdegenerasie-Chevrolet Utility het einde verlede jaar begin en die Chevrolet Spark, wat tans van Suid-Korea af ingevoer word, sal van volgende maand af plaaslik vervaardig word.
Die sesdegenerasie-Isuzu KB sal na verwagting in die eerste kwartaal van volgende jaar plaaslik as linker- en regterstuurmodelle vervaardig word.
Mnr. Ian Nicholls, visepresident van beplanning van GMSA, sê in ’n verklaring hy verwag dat die Suid-Afrikaanse voertuigmark vanjaar veerkragtig sal bly hoewel die groeikoers waarskynlik sal verlangsaam vergeleke met die vorige twee jaar as gevolg van plaaslike en internasionale ekonomiese druk.
“Suid-Afrikaanse ekonome voorspel ’n vinnige verhoging in verbruikersprysinflasie in 2012 vergeleke met verlede jaar wat die groeikoers sal beïnvloed.“Groei in die Suid-Afrikaanse ekonomie sal vanjaar na verwagting sowat 3% wees,” sê Nicholls.
Hy verwag ook dat die voertuigmark toenemend mededingend sal raak.
Daar is plaaslik sowat 80 handelsname beskikbaar en meer as 1 000 modelle.
Die verbeteringe wat GMSA aan sy verskeidenheid aangebring het, beteken hy kan sowat 70% van die mark dek.
Om in die huidige sake-omgewing te groei, is dit nodig dat die groep op die hoogte bly van tegnologie en vaardigheidsontwikkeling en deurlopend sy doeltreffendheid verbeter, sê Nicholls. Die groep beplan om vanjaar agt nuwe voertuie in Suid-Afrika bekend te stel waarvan ses Chevrolet-modelle is.
GMSA het verlede jaar verkoopsgroei van 24,4% aangeteken vergeleke met die vorige jaar. Die verkope van nuwe voertuie in die algehele mark het in die tydperk met 15,6% toegeneem.