Verwante Artikels
Top Stories
Mei 21 2012 05:00
Die beoogde uitfasering van loodvervangingspetrol gaan sekere motoreienaars geld kos.
Mei 21 2012 05:00
Geen van die staat se beloofde infrastruktuurprojekte het nog ’n werklikheid geword nie.
Mei 21 2012 05:00
Verskeie SA wynmakers het reeds ingeskryf vir die toonaangewende Chinese Wyntoekennings-plegtigheid.
Bloemfontein. – Air Liquide, ’n internasionale verskaffer van nywerheids- en mediese gas, gaan ’n projek van R400 miljoen in Suid-Afrika aanpak.
Hy het ’n ooreenkoms met Evraz Highveld Steel & Vanadium
gesluit om ’n lugskeidingseenheid met ’n vermoë van 770 ton per dag by sy aanleg in Emalahleni (voorheen
Witbank) op te rig.
Die eenheid sal na verwagting teen einde volgende jaar in bedryf
gestel word en sal vir die volgende 20 jaar vloeibare suurstof, stikstof en
argongas aan die plaaslike staalbedryf kan verskaf.
Air Liquide se ingenieurs- en konstruksiespanne sal die oprigting
behartig nadat die departement van omgewingsake
toestemming gegee het vir ’n omgewingsimpakstudie.
Volgens ’n verklaring deur Air Liquide help suurstof om
staalfabrieke se produktiwiteit te verbeter en ander uitlaatgasse te
verminder.
Mnr. Pierre Dufour, uitvoerende vise-president van Air Liquide in Afrika en die Midde-Ooste, het die
kontrak as ’n mylpaal bestempel. “Air Liquide is die rolspeler wat die vinnigste
groei in Suider-Afrika toon en die ooreenkoms is ’n belangrike verbetering van ons posisie in dié mark.”
Die groep het verlede jaar in ’n nuwe lugskeidingseenheid in
KwaZulu-Natal belê asook in ’n produksie-aanleg vir vloeibare argongas.
Evraz het verlede jaar sy kontrak met die JSE-genoteerde
gasprodusent Afrox beëindig nadat hy produksieverliese gely het weens
opskortings en onderbrekings van suurstofvoorraad
deur Afrox.