Verwante Artikels
Top Stories
Mei 21 2012 05:00
Die beoogde uitfasering van loodvervangingspetrol gaan sekere motoreienaars geld kos.
Mei 21 2012 05:00
Geen van die staat se beloofde infrastruktuurprojekte het nog ’n werklikheid geword nie.
Mei 21 2012 05:00
Verskeie SA wynmakers het reeds ingeskryf vir die toonaangewende Chinese Wyntoekennings-plegtigheid.
Seoel. – Die Suid-Koreaanse staalreus Hyundai Steel beplan om sy
jaarlikse produksievermoë teen 2015 van die huidige 19,1 miljoen ton tot
22,5 miljoen ton staal te verhoog.
Die maatskappy het drie staalaanlegte in Suid-Korea – in die stede
Dangdjin, Intsjeon en Pohang – wat tans onderskeidelik ’n jaarlikse
produksievermoë van 11,5 miljoen, 4,3 miljoen en 3,3 miljoen ton staal het.
Dangdjin se derde hoogoond van $9,48 miljard kan in September 2013 in werking
wees.
Hyundai Steel is ’n afdeling van die Hyundai-motormaatskappy en
verskaf onder meer staal aan dié maatskappy vir die vervaardiging van voertuie.
Dit stel hom in staat om kostes te besnoei en die gehalte van die
vervaardigingsproses van die staalproduksie af te
monitor.
Volgens mnr. Alan Ross, besturende direkteur van Hyundai
Automotive Suid-Afrika, is Hyundai die enigste internasionale motorvervaardiger
wat sy eie staal vervaardig.
Die uitbreiding van sy produksievermoë is deel van die
Hyundai-motormaatskappy se strategie om sy voetspoor internasionaal te vergroot.
Die groep sukkel reeds geruime tyd om sy vermoë sodanig uit te brei dat hy kan
byhou met die internasionale vraag na sy voertuie.
Volgens mnr. Jerry Joo, bestuurder van Hyundai Steel, was die
maatskappy se verkope verlede jaar sowat 7,15 miljoen ton gewalste staal,
waarvan 34% aan die motorbedryf verkoop is, 51% vir algemene gebruik en
verspreiding verkoop is en 15% uitgevoer is. Altesame 1,37 miljoen ton
staalplate is verkoop. Volgens Joo word die meeste van die ystererts wat vir die
vervaardiging van die staal gebruik word van Australië ingevoer, nog van
Brasilië en sowat 10% van Suid-Afrika.
- Sake24 het Hyundai Steel op uitnodiging besoek.