Verwante Artikels
Top Stories
Mei 21 2012 05:00
Die beoogde uitfasering van loodvervangingspetrol gaan sekere motoreienaars geld kos.
Mei 21 2012 05:00
Geen van die staat se beloofde infrastruktuurprojekte het nog ’n werklikheid geword nie.
Mei 21 2012 05:00
Verskeie SA wynmakers het reeds ingeskryf vir die toonaangewende Chinese Wyntoekennings-plegtigheid.
Johannesburg. – Vervaardiging en produksie het in die eerste drie kwartale van verlede
jaar matig versterk, maar dit het gepaardgegaan
met werkverliese.
Uit die nuutste verslag van die Nywerheidsontwikkelingskorporasie
(NOK) oor die vertoning van die primêre en sekondêre ekonomiese sektor blyk dit
dat 8 500 werkgeleenthede verlore gegaan het.
Mnr. Jorge Maia, hoof van navorsing en inligting van die NOK, sê
die gedempte aktiwiteit in die vervaardigingsektor sal nog ’n tyd voortduur. Dit
is te wyte aan die strawwe mededinging van buitelandse maatskappye met die
plaaslike mark en Suid-Afrika se afhanklikheid van die vraag in Europa.
Maia sê die druk op die vervaardigingsektor is een van die
nagevolge van die verswakking van die vooruitsigte vir die wêreldekonomie.
Dit is veral kommerwekkend dat indiensneming nog nie herstel het
tot waar dit voor die finansiële krisis was nie, al het die Suid-Afrikaanse
ekonomie in die afgelope twee jaar matig
herstel.
Luidens die verslag het indiensneming nie eens toegeneem in die vyf
sektore waar vervaardiging met meer as 10% verbeter het nie.
In die landbousektor het 16 000 werkgeleenthede in die eerste nege
maande van verlede jaar verlore gegaan. Daar is nou net 624 000 werkers in dié
sektor. Die verlies is veral kommerwekkend omdat dit plattelandse en afgeleë
gemeenskappe raak.
In die mynbousektor is in die selfde tydperk 15 700 werkgeleenthede
geskep. Die 295 000 werkgeleenthede in dié sektor is bykans dieselfde as voor
die finansiële krisis.
Werkgeleenthede is in veral platinum- en steenkoolmyne geskep,
terwyl indiensneming by goudmyne met 5,1% gedaal het.
In die twee subsektore (voertuie, onderdele en toebehore, asook
ander vervoertoerusting) waarin produksie sterk
gestyg het, het indiensneming ook gedaal.
Indiensneming in dié subsektore verteenwoordig 9% van alle
werkgeleenthede in die vervaardigingsektor.
In dié twee subsektore het vervaardiging met onderskeidelik 10,1%
en 9,7% toegeneem.
Die subsektore waar mededinging van buitelandse maatskappye die
grootste uitwerking op indiensneming gehad het, is die tekstiel-, plastiek- en
metaalsektor.
Indiensneming in die tekstielbedryf was 7,2% laer.
Teen die derde kwartaal van verlede jaar was net 3% van alle
werkers in die vervaardigingsektor in dié drie subsektore werksaam.