SABMiller het in die eerste ses
maande van sy huidige boekjaar goeie vordering gemaak om sy skuld af te bring,
maar swakker verbruikersmarkte in Europa en die VSA plaas groei onder druk.
Standard Sekuriteite sê in ’n navorsingsverslag winsgrense kan vir die volle boekjaar gehandhaaf word as die groep
volhard met kosteverlagings.
Verhoogde inkomste uit ontluikende markte kan ’n teenvoeter wees vir swakker inkomste uit
ontwikkelde markte. Terselfdertyd kan kapitaal-
besteding en bedryfskapitaal onder druk kom weens verdere uitbreidings, veral
in Afrika.
Biermarkte in groot dele van Europa, onder meer Pole, die
Tsjeggiese Republiek, Roemenië en Rusland, verkeer nog in bykans resessionêre
omstandighede.
SABMiller se inkomste in die halfjaar
was 5,3% swakker op $3 miljard, maar kostebesparings het ’n styging van 3,2% tot
$622 miljoen in ebitda meegebring.
“Ons verwag dat markte in Europa onder druk sal bly,” sê Standard
Sekuriteite.
Dit geld ook grootliks die Amerikaanse mark waar lagervolumes van
MillerCoors 3% swakker was. Groter sinergieë en stygende pryse het gehelp dat
inkomste met ’n bevredigende 12,3% tot $64 miljoen gestyg het.
SABMiller was nog altyd bekend vir sy
stewige kontantgenerering deur sy bierprodukte. Dit het die maatskappy ’n
gunsteling onder heelwat beleggers gemaak omdat kontant in moeilike ekonomiese
tye ’n bate is wat maklik meetbaar is en in die finansiële state vertolk kan word.
In die halfjaar was kontant uit bedrywighede onveranderd op
$2,2 miljard. Groter kapitaalbesteding het toenemend kontantgenerering uit
bedrywighede opgeslurp.
Vrye kontantvloei, wat kontantgenerering uit die vernaamste
inkomstegenererende bedrywighede van die groep minus kapitaalbesteding
weerspieël, was $153 miljoen laer.
Die groep het verder in die halfjaar aandag aan sy skuldposisie
gegee en rentedraende laste in die huidige omgewing van laer rentekoerse met 11%
tot $8,9 miljard afgebring.
Langtermynlaste is met 18,2% verlaag tot $7,2 miljard en
korttermynlaste met 43% tot $1,7 miljard. Laste en verpligtinge van $1,7 ?miljard
is terugbetaal. Dit het die verhouding van rentedraende laste tot voorbelaste
wins van 5,4 keer tot 4,3 verbeter.
Standard Sekuriteite sê dit is positief dat die groep nou aandag
gee aan kostebesparings. “Koste word goed beheer sodat ebitda-winsgrense
verbeter het. Terselfdertyd word kapitaalbeleggings nie verwaarloos nie, wat
positief is.”
SABMiller se aandeelprys het gister
in ooreenstemming met die swakker markte 474c of 2,07% swakker gesluit op
R224,10.
Die aandeelprys het op 19 November ’n jaarhoogtepunt van R242
aangeteken, maar het sedertdien afgeplat. Gister se verhandelings was teen ’n
prys-verdienste-veelvoud van 25, wat hoër as die markgemiddelde van 16,5
is.