Johannesburg. - Toyota Suid-Afrika gaan 400 kontrakwerkers aanstel by sy aanleg in
Durban.
Die maatskappy het van 2007 af 1 500 kontrakwerkers se dienste
beëindig. Daar werk tans sowat 8 500 mense vir Toyota in Suid-Afrika.
Toyota sê die Suid-Afrikaanse ekonomie groei weer stadig en dit
kan in motorverkope gesien word.
Dr. Johan van Zyl, uitvoerende hoof van Toyota Suid-Afrika, het Donderdag in Johannesburg ’n voorlegging gedoen oor die stand van die
Suid-Afrikaanse motormark. Hy verwag dat 475 000 motors vanjaar in Suid-Afrika
verkoop sal word; 20% meer as verlede jaar.
Van Zyl sê daar is steeds kommer oor uitvoer. “Die markte in Europa – waarheen ons hoofsaaklik uitvoer –
ondervind uiters stadige ekonomiese groei. Dié markte bly die moeilikste vir
motorverkope in die jaar wat voorlê.”
Van Zyl sê motorvervaardigers in Suid-Afrika sukkel ook weens die
uitwerking van die sterk rand.
“Die probleem is dat inflasie plaaslik toeneem, maar ons kan nie
dié koste verhaal van die motors wat ons uitvoer nie, want dan is ons nie meer
mededingend nie. As die rand sterk is, soos nou, word dit te duur om uit te
voer.”
Van Zyl sê vervaardigers verkies ’n stabiele wisselkoers wat die
ekonomiese aktiwiteite in die land weerspieël.
“Die rand word eenvoudig te veel beïnvloed deur die kapitaal wat
deur die JSE vloei.”
Mnr. Andrew Kirby, senior adjunkpresident van verkope en bemarking,
sê dit is belangrik dat plaaslike motorvervaardigers meer uitvoer.
“Plaaslike vervaardigers het oortollige vervaardigingsvermoë wat
net deur groter uitvoer benut sal kan word.”