Johannesburg. – Die JSE het Vrydag in middagverhandelinge diep in
die rooi geboer met negatiewe sentiment wat deurgesyfer het in
wêreldmarkte voor die bekendmaking van die bruto binnelandse produk-data vir die
tweede kwartaal in die VSA.
Die JSE se indeks van alle aandele het met 1,06% gesak tot 28
246,68 punte. Die finansiële indeks was met 1,35% in die rooi op 8 009,61 en
hulpbronne het met 1,16% gedaal tot 48 230,45.
Die nywerheidsindeks het met 1% verswak tot 22 992,24 punte.
Die rand het Vrydag ietwat verstewig tot R7,34/$ van R7,35/$ toe
die JSE Donderdag gesluit het. Die plaaslike geldeenheid het Vrydag R9,56 vir ’n
euro gekos en R11,46 vir ’n pond.
Die goudprys het Vrydag $1 169,61 per fynons gekos van $1 162,70
per fynons toe die JSE laas gesluit het.
- I-Net Bridge en Sake24