Johannesburg. – Die JSE het ná 15:00 weer begin verhandel nadat 'n tegniese probleem die beurs Dinsdag tot stilstand geruk het.
Die probleem het kort ná sy opening om 09:00 verhandelings gestop.
Dit is nog nie bekend of die JSE sy sluitingstyd sal aanpas om op
te maak vir die probleem nie.
Dit is die tweede keer in drie weke wat die plaaslike beurs deur ’n
tegniese probleem getref is. Die JSE het op 12 Julie tegniese probleme ervaar
wat hom gedwing het om eers teen 10:30 te verhandel.
Die JSE se indeks van alle aandele het nadat verhandelinge begin het met 0,19% geklim tot 28 552,55 punte. Hulpbronne was met 0,45% in die swart en die finansiële indeks met 0,23%. Die nywerheidsindeks was met 0,12% in die rooi.
Die rand het Dinsdag steeds sterk vertoon en het sowat
R7,32 vir
’n dollar gekos van R7,35 toe die JSE Maandag gesluit het. Die plaaslike
geldeenheid het Dinsdag R9,51 vir ’n euro gekos en R11,38 vir ’n pond.
Die goudprys het Dinsdag $1 183,64 per fynons gekos
van $1 181,43 per fynons toe die JSE Maandag gesluit het. – I-Net Bridge en Sake24