Johannesburg. – Die FTSE/JSE se indeks van alle aandele het die
afgelope drie maande ’n negatiewe opbrengs gelewer en dit wil voorkom asof dít,
tesame met die einde van die Wêreldbeker-sokkertoernooi, deursyfer na die psige
van Suid-Afrikaanse beleggers.
Die Julie-opname van die Sanlam Beleggingsbestuur- vertroueindeks
het gewys dat plaaslike beleggers meer positief is oor die nabye korttermyn (tot
drie maande), met groeiende pessimisme oor die langertermyn-syfers wat kop
uitsteek.
Die opname word gedoen onder finansiële raadgewers en
institusionele beleggers. Me. Candice Paine, kleinhandelhoof van Sanlam
Beleggingsbestuur, sê hoewel beide groepe van respondente steeds positiewe
opbrengste vir aandele vir die volgende 12 maande verwag, het dié verwagtinge
met 7,66% in Junie gegly tot 6,11% in Julie.
“Oor een maand het beleggers ’n verhoogde moontlikheid gesien van
die mark wat ’n positiewe opbrengs lewer. Maar oor drie maande was
institusionele beleggers baie meer negatief oor opbrengste, en verwag dat die
JSE se indeks van alle aandele slegs 0,07% vir die tydperk sal lewer.”
Dié onsekerheid of stille optimisme onder die groep word ook
weerspieël in die waardasie-indeks. Die indeks wys die gedeelte van beleggers
aan wat gedink het aandeelpryse was te laag, te hoog of net reg.
“Hoewel daar nie ’n groot skuif in die 50% van die beleggers was
wat gedink het die markwaardasie is neutraal nie, wil dit voorkom asof daar ’n
beduidende aantal oorlope was van dié wat gedink het die mark was te goedkoop na
dié wat gedink het dit was te duur.
“Dit kan die siening weerspieël dat maatskappyverdienste laer gaan
wees en dus dat vorige aandeelwaardasies dalk bietjie te optimisties was,” het
Paine gesê.
“Ondanks ekonomiese groei en maatskappyverdienstes wat laer is as
wat respondente voorheen verwag het, is daar geen aanduiding van paniek onder
die twee groepe.
Beleggers bly optimisties oor met hoeveel die mark sal herstel op
die dag ná ’n daling van 3%.”
Die verwagte persentasie-opbrengs ná ’n daling van 3% in die
aandelemark het geklim tot 0,96% in Julie van 0,52% in Junie, sê Paine.
Me. Gerda van der Linde, uitvoerende direkteur van die instituut
vir beleggersgedrag, ’n navorsingsorganisasie wat die peiling doen, sê: “Bewyse
van ’n afswaai in Amerika se ekonomie, voortdurende kommer betreffende skuld in
Europa, dreigende plaaslike stakingsaksie en die invloed daarvan op
maatskappyverdienste, werkloosheid, bewyse wat voortdurend voorkom vir korrupsie
en ander negatiewe nuus bevestig voortdurend beleggers se vrese en vuur hul
chroniese onsekerheid aan.” – I-Net Bridge