Dit is ironies hoe baie mense aan die begin
van ’n jaar nuwejaarsvoornemens het. Al weet hulle dat dit eintlik tog nie
werklikheid gaan word nie – maar tog, die hoop beskaam nie!
So is dit ook by sake-ondernemers. Ek
hoor gereeld hoe sakeondernemers met verwagting praat van hierdie jaar sus of
hierdie jaar so – so al asof dit die nuwe jaar is wat nuwe insig en vaardighede
moet bring. Maar dit kan tog gebeur.
Dikwels hoop ons maar net dat dinge sal verbeter, maar as jy nie
jou planne hersien en aanpas nie, sal dieselfde gebeur as in die verlede.
Dit is dus tog ’n goeie plan om met die aanbreek van die nuwe jaar
nuwe planne of doelwitte vir jou onderneming te stel.
Sukses in sake-ondernemings gebeur egter nie vanself nie. Dit is
beslis ook nie die gevolg van geluk nie
, ofskoon geluk altyd verwelkom sal word.
Sukses is die gevolg van die eienaar of bestuurder se goeie insig, oordeel en
veral bestuurs- en beplanningsvernuf.
Dit is ook ’n goeie tyd om bestek op te neem van die onderneming.
Dikwels is die onderneming sowel as die ondernemer in ’n groef en weet hulle nie
heeltemal hoe om te ontsnap nie.
Oorweeg die volgende:
(nie
nuwejaarsvoornemens nie):
Delegeer meer:
Dikwels is die
sake-ondernemer so gewoond daaraan om al die besluite te neem dat hy of sy
vergeet daar is ander bekwame mense in die onderneming wat dalk met nuwe oë na
’n probleem kan kyk en beter oplossings kan bied.
Bemark deurlopend:
Sake-ondernemers moet besef dat enige vorm van reklame eers
ná die agtste poging doeltreffend raak.
Beplan weekliks :
Beplanning is nie ’n eenmalige
aksie aan die begin van die jaar nie. Daar is sekerlik aspekte soos kontantvloei
en voorraad wat weekliks beplan en bestuur moet word.
Leer iets nuuts:
Die vaardighede van mededingers
verbeter daagliks namate nuwe toetreders die mark betree. Moenie onverhoeds
betrap word nie en sorg dat almal in die onderneming op die hoogte van nuwe
produkte, toerusting en tegnologie bly.
Verbeter sake-netwerke:
Dit is
dalk nou die tyd om jou by ’n sakekamer of soortgelyke sake-netwerk aan te
sluit. Moenie vra wat dit vir jou kan beteken nie – vra eerder wat jy vir jou
sakegemeenskap kan beteken. In die proses sal jou onderneming beslis daarby baat
vind.
Koop jouself om:
Dis glad nie ’n
slegte plan om jouself om te koop ten einde sekere doelwitte te bereik nie.
Belowe jouself die lank verwagte vakansie of lang naweek as jy sekere doelwitte
in die onderneming bereik. Só hou jy die persoonlike motiveringsvlakke
lewendig.
Loop weg:
As jy nie meer die
motivering het om sekere dinge in die onderneming te doen nie, moet jy dit
oorweeg om iemand anders die kans te gee om die probleem op te los of toegee dat
’n oplossing nie moontlik is nie. Oorweeg die alternatiewe, neem ingeligte
besluite en bly daarby.
As ’n sake-ondernemer jaar ná jaar dieselfde dinge doen as die
vorige jaar, moet hy of sy nie verbaas wees as dieselfde resultate behaal word
nie! Wees daarom kreatief – probeer iets nuuts!
- Prof. Du Plessis is die direkteur van die Potchefstroom
Besigheidskool (PBS) van die Noordwes-Universiteit waarby die Adviesburo vir
Kleinsakeondernemings (ABKS) ingelyf is.