Verwante Artikels
Top Stories
Mei 21 2012 05:00
Die beoogde uitfasering van loodvervangingspetrol gaan sekere motoreienaars geld kos.
Mei 21 2012 05:00
Geen van die staat se beloofde infrastruktuurprojekte het nog ’n werklikheid geword nie.
Mei 21 2012 05:00
Verskeie SA wynmakers het reeds ingeskryf vir die toonaangewende Chinese Wyntoekennings-plegtigheid.
Kaapstad. – Die voordele van die ontginning van onkonvensionele
aardgasbronne in Suid-Afrika oorskadu die omgewingsrisiko van hidrouliese
breking, sê prof. Maarten de Wit, geoloog van die Nelson Mandela Metropolitaanse
Universiteit in Port Elizabeth.
Maar hy vertrou nie die maatskappye soos Shell en ander om hulself
doeltreffend te reguleer nie. Hy vertrou ook nie die regering om die bedryf
doeltreffend te reguleer nie.
Hy vertrou nie die media om akkuraat, objektief en gebalanseerd oor
die debat oor skaliegas en hidrouliese breking te
berig nie.
Hy vertrou nie omgewingsgroepe om akkurate inligting oor die
kwessie te versprei nie, en hy vertrou ook nie die ryk grondeienaars en
prokureurs nie, het hy in ’n lesing oor die skaliegasdebat by die Universiteit
van Kaapstad se Somerskool gesê.
De Wit meen wat nodig is, is ’n werklike openbare debat met
korrekte en betroubare inligting, en onafhanklike forensiese monitering van
gasmaatskappye se bedrywighede.
Hy meen boonop bestaande boerderybedrywighede in die Karoo, waar
Shell en ander groepe skaliegas wil ontgin, is nie volhoubaar nie.
Huidige boerderypraktyke soos skaapboerdery lei volgens hom tot
baie vinniger gronderosie in die Karoo as om die gebied in sy natuurlike staat
te los.
De Wit sê daar is wel bewyse dat aardgas al gelek het tot in
drinkwater weens hidrouliese breking en skaliegasontginning.
Wat gedoen moet word, is om waterboorgate in Suid-Afrika nou reeds
te toets en die gasinhoud van ondergrondse waterbronne en boorgate te toets om
’n maatstaf te hê waaraan gasmaatskappye se bedrywighede gemeet kan word.
Suid-Afrika het egter nie die soort verfynde toerusting om sulke
toetse te doen nie.
Die enigste laboratorium wat sulke toetse kan doen, is in
Kanada.
Lekkasies vind plaas weens swak konstruksie van sement- en
staalvoerings in skaliegas-boorgate, wat veroorsaak dat die metaangas na
ondergrondse waterbronne uitlek.
Hoewel ingenieurs boorgate ontwerp om lekkasies onwaarskynlik te
maak, gebeur dit dat kontrakteurs kortpaaie vat om geld te bespaar.
De Wit sê dit is wat in die olieramp in die Golf van Mexiko gebeur
het, waar die kontrakteur Halliburton goedkoop sement uit Venezuela gebruik het
om geld te bespaar.
Hoe ouer ’n boorgat is, hoe groter is die kans dat lekkasies
ontstaan. Spesiale toetse is nodig om te kan bewys waarvandaan die gas kom wat
uitlek.