Dit is weer tyd vir die Sake24 en Sanlam iTrade se Wat kan jý doen
met ’n miljoen?-kompetisie.
Dié uiters gewilde jaarlikse kompetisie het 1 Junie afgeskop en gee
aan voornemende beleggers die ideale geleentheid om sonder enige risiko te leer
hoe beleggings op die JSE werk.
Elke deelnemer kry ’n fiktiewe R1 miljoen en moet dan oor ’n
tydperk van vier maande deur aandele-beleggings in dié belegging laat groei. Die
persoon wat einde
September sy portefeulje die meeste laat groei het, sal R100
000 harde kontant ryker wees.
“Ons het verlede jaar meer as 12 000 deelnemers gelok en die
kompetisie was ’n reuse-sukses,” sê Ryk van Niekerk, redakteur van Sake24.
“Die kompetisie is daarop gemik om bestaande en voornemende beleggers ’n
risiko-vrye geleentheid te gee om in aandele te belê.
“Sake24 en Sanlam iTrade sal as deel van die kompetisie ook
opleidingskursusse regoor die land aanbied waar deelnemers meer oor die
verhandelingsplatform en aandelebeleggings kan leer.”
Mnr. Gerhard Lampen, hoof van Sanlam iTrade, sê die kompetisie is
inderdaad ’n groot opvoedkundige projek.
“Die kompetisie is nie net vir voornemende beleggers nie, maar ook
vir bestaande beleggers wat dalk sonder enige risiko nuwe beleggingstegnieke wil
toets.”
Die reëls van vanjaar se kompetisie is effens verander om die
speelveld so gelyk as moontlik vir onervare en ervare beleggers te maak.
Die vernaamste twee veranderings is dat deelnemers vanjaar net uit
die top 100-maatskappye en indeksfondse soos die Satrix-instrumente mag belê.
Daar is dus in totaal 120 instrumente waaruit deelnemers kan kies.
Die tweede groot verandering is die prys wat deelnemers vir aandele
betaal. Vanjaar sal deelnemers aandele koop teen die heersende verkopersprys,
terwyl deelnemers wat aandele verkoop, dit teen die kopersprys sal doen.
Indien jy enige probleme met die registrasieproses ervaar, kan jy
’n e-pos aan Johan Vos van Sake24 by johan.vos@sake24.com of Werner Erasmus van
Sanlam iTrade by wernere@spi.sanlam.com stuur.